馬明心穎齊齊做業主羅仲謙抽樓兩次都唔中

【蘋果日報】買樓上車係唔少香港人嘅目標，不過香港樓價貴到咩咁，呢個目標喺好多人心目中都係遙不可及。而喺有唔少圈中朋友都話畀大家知一分耕稼、一分收穫，只要肯努力喺圈中買樓不是夢。


勵志組　高海寧

入行7年嘅高海寧喺2015年以525.7萬元購入油塘新盤Peninsula East第1座中層B室，等足兩年喺月前終於收樓喇！佢仲喺IG post相喺父母陪同下一齊收樓由「買家」變「業主」，佢仲話儲足7年終於可以做業主真係非常興奮。


孝順組　馬國明

有「特級筍盤」之稱嘅馬國明喺去年豪擲近2,000萬買太古城特色戶，當時佢仲話：「我真係未諗過搬開住，爸爸退咗休，媽媽係家庭主婦，我算開始有啲事業養家，independence係唔需要依賴，反過來可以俾老人家依賴下我，唔係更有滿足感咩？」買豪宅同爸爸媽媽住真係man到呢！

姊妹情組　黃心穎

除咗「特級筍盤」馬國明之外，佢女友心穎BB一啲都唔輸蝕，同家姐黃心美喺父母資助之下豪花過千萬，喺油塘Ocean One買咗個單位，而喺今年又再入手購天寰一伙2房單位，今次仲要係自己畀錢o添！

不幸組　羅仲謙

去年同楊怡結婚嘅羅仲謙，由未結婚嗰陣已經準備買樓築愛巢，仲齊齊蒙面排隊打算買將軍澳緻藍天，不過都係最後排唔到。而去到今年謙謙現身荃灣海之戀售樓處似乎打算再出手，不過最後又係抽唔到，認真黑仔。