同十年女友分手第三者周亭羽坐正

【蘋果日報】作家、導演九把刀喺事業上就好成功，感情路上，九把刀就經歷得多喇，喺2014年10月，九把刀當時有一個拍拖10年嘅女朋友小內，但被爆出佢同主播周亭羽開房，之後佢直接認咗兩個女仔都鍾意，但堅持唔同正印小內分手，仲一齊去日本旅行。


事件爆出之後，九把刀曾承諾以後都唔見周亭羽，又公開向小內道歉：「小內有她跟我相處的特殊之道，我們其實比外界想像的要快速回到原來的感情…一開始她當然大發雷霆…可就在我歷經了極震撼的有問必答後，她希望我寫一張溫暖的卡片給她，此後抬頭挺胸好好跟她相處…不要因為犯了錯就整天搖尾乞憐。」、「我犯了錯，但她拯救了我。她拯救了我。」


但過咗半年之後，九把刀坦承同小內分開，而周亭羽就因為呢件事冇得再做主播，轉咗去做文字記者，後來亦離開了中視。看似再冇關係咁，但過咗一年，九把刀被影到同周亭羽打棒球約會，佢就即時承認「交往中」。雖然九把刀講過，同第三者有共識「雙方是沒有未來的」，但最後都係一齊咗，但就有傳九把刀媽媽仍然未接受周亭羽。


至於18歲就識九把刀，最後卻成為輸家被背叛嘅小內，細九把刀9年，即係依家剛好30歲，嗰陣佢係透過朋友介紹認識偶像九把刀，就係咁開始拍拖。小內原本係喺出版社擔任插畫家，同九把刀分手後，近況不得而知，但去年台灣《蘋果》曾引述友人透露，小內已經變身成為一般上班族，但異性緣唔差，不必為她擔心。