【理髮有道】含矽洗頭水有幾恐怖？髮型師：風筒一吹係臭架

【蘋果日報】消委會報告早前引述學者指洗頭水含有的矽（Silicone），不會過度積聚在頭髮甚至頭皮上。不過，專業髮型師卻不認同，認為矽會積聚在頭髮上，長期使用含矽洗頭水，更會堵塞頭皮毛囊，出現痕癢、頭瘡、頭髮變幼及脫髮等問題，若要頭髮健康，首要是選擇適合自己頭皮的無矽洗護產品。


記者：伍雅謙

髮型師Porky表示，平日接觸顧客，發現大部份人頭髮最大問題是頭臭、頭油及污糟，普遍原因是用錯洗頭水及護髮素，包括含有矽的洗護產品，「正常嘅頭髮，同用過Silicone洗頭水嘅頭髮，係有好大分別」。他解釋頭髮本身不會流汗，頭髮會油會「笠」，全因為頭皮，當頭皮毛囊長期積聚了矽，毛孔被堵塞，亦容易黏著塵埃，難以完全清淨頭髮，「成個頭好似無洗過咁，但佢話岩岩洗完出嚟」。


他指，矽一定會留在頭髮上，長期使用含矽洗頭水，當頭髮累積了矽，「摸落去頭髮感覺上已經有啲膠，再用熱力吹啲頭髮，個陣味你想嘔呀」，以顯微鏡觀察頭皮，「好明顯個毛囊係會填平咗，係會有啲油脂係度」。頭皮有機會因此出現痕癢、頭瘡、頭髮變幼及脫髮，「毛囊堵塞咗，條頭髮好難生出嚟」。他稱，當頭皮積聚了矽，不容易一次便洗甩，嚴重者可能更需要用專門的清洗用品。要了解洗頭水是否含矽，除留意成份標籤，他指一般能做出順滑頭髮的洗頭水，大多含有矽或甲醛。


除洗頭水要選擇無矽產品，他建議大家使用護髮素，男士亦然，有時男士頭皮感到繃緊，便因太乾燥之故，「轉季都要搓啲潤啲嘅hand cream（潤手霜）啦」。他指，有女士以為自己頭髮柔軟，便不用護髮素，但熱水、熱風及磨擦均會對頭髮做成傷害，尤其長髮的人頭髮容易乾枯及營養不足，需要靠外物幫助，否則便有打結或斷裂的情況。


每次洗髮後，他指可以毛巾輕輕印乾頭髮，勿磨擦頭髮令髮絲易斷，以風筒吹乾頭髮前，可塗抹髮尾油保護秀髮。若要選擇合適髮尾油，可將髮尾油塗在手上，當塗手霜塗抹，若快速被吸收，便屬於合適的髮尾油。


想輕輕鬆鬆健康啲，記住留意健康蘋台

http://health.appledaily.com.hk/