娛圈影后級媽媽好顧家君如自稱非虎媽

【蘋果日報】時代轉變，社會對女性嘅身份定位亦已經唔同，唔再追求「男主外，女主內」呢一套古舊思想，事實上事業型女性喺工作上亦未必比男性差，甚至有唔少女性可以事業家庭都可以完美兼顧，而娛樂圈中亦有唔少影后級媽媽，既可以繼續拍戲拍劇亦可以細心照顧栽培自己嘅子女成才。


袁詠儀

參選港姐奪冠出道嘅靚靚袁詠儀，94年憑《新不了情》奪得金像影后，同老公張智霖喺2001年結婚，被喻為圈中嘅金童玉女，兩人嘅愛情結晶魔童喺2006年出世，阿仔出世後靚靚短暫休養咗一年之後就已經復出，咁多年嚟都仲有keep住拍戲拍劇，而一家人亦非常之咁溫馨有愛，羨煞旁人。


趙薇

現年41歲嘅趙薇，98年憑一套瓊瑤嘅電視劇《還珠格格》喺香港打響名氣，之後更喺星爺嘅《少林足球》擔任女主角，2008年同導演老公黃有龍結婚，2010年產下一女後未有淡出，繼續拍戲，更喺2015年金像獎憑《親愛的》成為影后。


林嘉欣

2002年同張學友梅艷芳等巨星一齊拍嘅《男人四十》，令林嘉欣一躍成為金像獎同金馬獎嘅最佳新演員加最佳女主角，之後仲連續四年提名影后，喺影壇發光發熱嘅佢2010年同導演老公袁劍偉結婚，同年誕下大女Kayla，短暫退出一年之後就復工，2013年誕下細女Sofie，之後一路積極拍戲直至現時。


楊千嬅

95年參加新秀而殺入歌壇嘅楊千嬅，除咗唱歌之外，喺2000年開始仲涉足埋電影圈，開始時都係拍喜劇居多，直至2010年嘅《志明與春嬌》，佢就開始跳出喜劇框架，同老公丁子高喺2009年結婚，2010年誕下囝囝Torres後未有停工，2013年嘅金像獎更憑《春嬌與志明》奪得影后殊榮。