傘運期間　港姐雷莊兒籲中共： 勿改變已經完美的東西

【蘋果日報】今屆香港小姐冠軍雷莊兒（Juliette）自當選之後爭議聲不絕，而討論重點多數都放咗喺佢嘅美貌之上，之但係其實香港小姐競選除咗美貌之外，智慧都好緊要，而Juliette嘅內在就好似冇乜人有討論過。
Juliette嘅爸爸雷葆文係香港十大傑出設計師之一，喺商界都可以話係有頭有面，更早喺八十年代已經進軍內地市場發展，仲曾經被邀去到中央工藝美術學院交流，喺內地打滾多年，同好多官員都關係良好，而早前廣東省青聯舉行嘅香港研修班，佢仲係其中一班導師，同中聯辦關係密切。
早年舉家移民去加拿大嘅雷葆文，好多時都會留低老婆同兩個女，去內地做生意，雖然有傳聞佢哋屋企有過億身家，但係Juliette喺一次訪問中就否認呢單傳聞，仲話連大學學費都要靠自己先搞得掂。
有個同內地關係密切嘅老竇，Juliette當然都好關心中港關係。可能因為自細移民去加拿大嘅，Juliette對於民主自由等議題都非常關注。
2014年，雨傘革命期間，遠在加拿大嘅Juliette，非常關心香港嘅情況，更加喺社交網站留言表示：「Stop changing what is already perfect, China.」（中國，不要去改變已經完美的東西）
而佢仲曾經參加過喺多倫多聲援雨傘運動嘅遊行，叫喺香港嘅朋友要堅持，睇嚟老竇嘅紅色資本背景都冇阻礙佢對民主自由嘅追求。