星級巨B晒冷Eason玩蘇永康囝囝勁興奮

【蘋果日報】Happy Sunday!有啲朋友識咗好多年，即使各有各忙，唔係成日見，都有好多話題講唔完，之不過朋友係要抽啲時間見。前日下午，Eason兩公婆、車婉婉、蔡一智、周雪芳、蘇永康及馮翠珊等，約埋喺淺水灣一間餐廳，聚一聚，主角就落咗喺兩位星級巨B身上，就係蘇永康半歲囝囝Jazz、車婉婉混血囝囝Justus Quinlan（BBQ）。
蘇永康昨日喺Ig貼一條片，片中見Eason同囝囝Jazz玩緊，係咁哄埋去，o氹得Jazz好開心，最後Jazz仲挨喺Eason膊頭，蘇永康感性留言：「沒有這位契爺，我根本識唔到你媽媽，也根本沒有你……爸爸每天都在感恩。Thanks bro在心中!」Jazz真係好多人錫，男神黃子華係佢契爺，歌神Eason又係噃!
同場仲見蔡一智同徐濠縈都有抱車婉婉囝囝BBQ影相，阿仔真係同婉婉好似樣，車婉婉喺Ig貼囝囝單人相，見出咗牙仔，婉婉就話BBQ成日超牙痕，超多口水，「這幾天Q MaMa極度忙於照料身體抱羔的老闆，忘記和大家宣佈一下：BBQ第二隻牙都出晒嚟啦」。
此外，媽咪級嘅周雪芳同馮翠珊就同婉婉分享湊B經，「Q氏和一眾好友及二代聚首一堂，過了個愉快的星期天下午，BBQ因為身體欠佳，已經多日足不出戶，今天算好了很多!特別多謝雪芳EE對Q MaMa的提示(有關於BB病病的照料須知)，真的獲益良多。I love MaMa's talk」。