歐洲股神愛坐艇遊西貢

【明報專訊】綽號「歐洲股神」嘅富達投資總裁安東尼波頓（Anthony Bolton），近日喺香港人氣愈來愈盛。噚日富達同傳媒搞咗個聖誕自助餐，波頓都有到場。佢4月決定來港後，即刻用咗7000幾萬買中半山Mayfair一個單位，問「歐洲股神」Mayfair好唔好住，佢話呢個單位雖然係佢一世人至今買得最貴嘅，但係就好鍾意。

原來波頓喺倫敦嘅時候，住喺市郊，30年來每日用粒半鐘返工，來到香港，佢唔想再係咁，於是就買了Mayfair。

來到香港，波頓當然相當忙碌，如果唔係佢嘅「中國特殊情况基金」點可以大幅跑贏大市，4月以來升咗34％。

閒來駕快艇 難忘西貢海岸線

忙碌之餘，波頓話間唔中都有喺香港郊遊梳乎下。原來「歐洲股神」喺香港有一部小型快艇，佢話夏天天氣好時，試過將艇駛去香港嘅東部水域，即係西貢一帶。嗰啲「岩岩蠶蠶」嘅海岸線，令佢印象難忘，佢話希望遲啲有機會的話，將快艇駛埋岸，登上香港的東部海岸遊歷一下。

原來波頓都好鍾意行山，佢亦知道香港到處都係行山好去處，可惜未有太多時間去探索。佢話香港嘅獨特之處，係只要揸車好短時間，風景已經唔同晒。小琴記得外國電視節目Discovery Channel介紹香港時，都話由中環揸半個鐘車，去到石澳已經可以喺懸崖邊玩滑翔傘。希望「歐洲股神」繼續跑贏大市之餘，亦可以好好享受香港嘅生活。

報料電郵﹕piano@mingpao.com