爆粗港姐馮盈盈為細佬讀營養學

【蘋果日報】呢幾年嘅港姐冠軍，都好有話題性，啱啱當選嘅雷莊兒（Juliette）就被人覺得兒戲當選，之前就有「十優港姐」，而上屆冠軍馮盈盈，當選後就被人揭發原來係「爆粗港姐」。
先介紹番馮盈盈，佢喺DSE考到28分，入讀港大食物及營養學系，做埋「港大校花」，佢仲喺訪問講過，因為細佬身體有事，長期飲食清淡，要嚴格控制飲食，呢樣嘢令佢對飲食好有興趣，所以先揀咗營養學修讀。
至於「爆粗港姐」事件，是咁的，馮盈盈未畢業就參選港姐，都算係大熱當選，結果不負眾望贏到冠軍。馮盈盈當選一日內被人起底，曾經喺facebook激烈爆粗留言，包括「全盛時期嘅tree gun（鍾樹根）到底要X幾多鑊先夠？」、喺雨傘運動中就「X你老X冚家X！條死鹹蟲大大力狂揸落去，個女仔不停喊非禮都唔放手……」等等，之後佢受訪時解釋：「好關心香港嘅時事，愛之深，責之切，所以特別有強烈嘅情緒。」另一單呢，就係馮盈盈幫司徒夾帶拍玩滑翔傘片，飛到半空就興奮到爆粗，講咗句「呆X咗！」
經過一年浸淫，馮盈盈有晒經驗喇，早前佢就安慰Juliette，話香港小姐好難做，啱啱起步要從中學習，um……由馮盈盈講出嚟，係有說服力嘅。