新聞類別
財經
詳情#
【明報專訊】早前「維基解密」披露國務院副總理李克強喺3年前同美國駐華大使講，中國GDP數據係「人造」，佢只會集中睇耗電量、鐵路貨運量、同銀行貸款情况評估經濟增長，李克強呢番話有冇塞錢入你袋小琴就唔知喇，不過，連末日博士麥嘉華都話呢啲指標相對可靠喎。
末日博士認同可靠
對於李克強所講嘅三大指標，係咪可以睇穿整個中國經濟，亞太區權威資產管理雜誌《AsianInvestor》唔敢怠慢，專登問投資銀行、獨立經濟學者同埋投資者嘅睇法，結果，一眾投資銀行包括摩根士丹利、摩根大通、高盛、UBS、CLSA、德意志銀行都係話呢個議題太敏感，唔敢答。
相對而言，班經濟學者同投資者就暢所欲言好多，好似過去多次準確預測金融危機而有「末日博士」之稱嘅國際知名投資專家麥嘉華就話，「佢（李克強）指出的數據都係實體經濟嘅指標，相對可靠。」有經濟學者亦贊同，借貸數據同耗電量確實係重要指標，但只靠三組數據，並唔足夠分析中國與其他國家嘅經濟。
點解咁講？好似內地第3季耗電量稍為回落，就咁以為經濟增長減慢就大錯特錯喇，因為背後主因係企業，要趕快喺年底前符合國家早訂下節能指標。又好似借貸數據咁啦，有個唔開名嘅獨立經濟學者話，近期內地銀行已經識得搵方法令到一啲貸款唔曝光，數據可靠性可想而知，佢仲話，內地銀行習慣係農曆新年前批出大量貸款，即係話，如果明年1月銀行借貸仍然手鬆，就要預咗會有雙位數字通脹，有排捱呀！
回應 (0)
