齊藤由貴偷食後果大爆料者係姦夫老婆？

【蘋果日報】51歲日本女星齊藤由貴搭上同樣篤信摩門教嘅50多歲已婚醫生，姦夫接受電視台訪問承認同齊藤由貴嘅婚外情長達五年，令齊藤由貴形象破產，佢代言嘅廣告商以及事務所都收到大量投訴，由佢主持嘅電台節目《All Night-NIPPON MUSIC10》已宣佈無限期停工，不過齊藤由貴接拍嘅劇集暫時未有影響，當為《神奈小姐》拍完埋尾後，佢已為2018年大河劇《西鄉殿》開工。
齊藤由貴姦夫被雜誌《Flash》連環爆料，日前更刊登佢頭笠女人底褲嘅絕密照片，似足《變態超人》主角一樣，而照片被指是在齊藤由貴寓所拍攝，後面放有齊藤嘅家庭照，有揣測指呢張相應該係由齊藤由貴操刀。偷食消息令齊藤由貴身敗名裂，佢自言已聯絡警方，望抽出公開密照嘅幕後黑手，日本傳媒初時估計放料者係醫生嘅老婆，但近日有最新說法，事關照片曝光後，醫生同樣成為受害者，對其家人亦毫無好處，所以齊藤由貴查證爆料者並非雙方家人先會講明採取法律行動，相信亦有可能係被黑客入侵電腦或手機才令照片曝光。