新聞類別
財經
詳情#
【明報專訊】賭王何鴻燊出院後愈來愈精神，原來仲準備咗份「超大禮」畀四太梁安琪——市值近48億嘅澳博（0880）股份。小琴知道後即刻打電話畀梁安琪，點知四太回應：「好濕碎啫！」小琴大驚小怪，失覺晒！
賭王早排將2億幾股、市值十幾億銀嘅信德（0242）股份轉畀二房包括超瓊、超鳳同何猷龍等子女，惹起「分家」疑雲，原來好戲在後頭，噚日港交所資料顯示，賭王喺12月10日減持3.81億股澳博，同日澳博執董梁安琪就增持咗相同股數，令四太喺澳博嘅持股量，由0.66%激增至7.69%。
四太澳博持股激增
以澳博噚日收市價計，批股份值成48億銀，小琴打畀四太恭喜佢身家暴漲，四太馬上回應一句「好少嘢啫，公司大股東同管理層都冇變動」。小琴話批股份值成幾十億喎，四太仍然輕描淡寫咁話「何生知我由澳博上市以來好努力為公司做嘢，而且幾億股相對公司股本只係小數目。」睇返澳博個股價，08年以3.08蚊上市，到家升到上12.58銀，的確又係交到功課嘅！
四太一再強調，澳博所有嘢不變，而今次轉讓係一早計劃嘅，不過係喺賭王將信德部分股本轉畀一班仔女前定後計劃，四太就冇評論。小琴職業病發作，幫四太計一計，佢手持淺水灣大宅、香島道獨立屋、貝沙灣獨立屋、美國銀行中心10樓全層、中環娛樂行全幢等，仲有君臨天下、嘉亨灣及浪澄灣幾十伙單位，再加埋今次呢批股份，身家分分鐘過200億銀，怪唔得之前用257萬投白松露菌都冇手軟啦。
報料電郵﹕piano@mingpao.com
回應 (0)
