阿叻認靠黃杏秀過活爆王晶無良：我係鱷魚頭老襯底

【蘋果日報】阿叻之前拍王晶套電視劇《賭城群英會》，昨日同老婆黃杏秀出席活動，佢自言係鱷魚頭老襯底，之前幫王晶拍劇，阿叻大爆被王晶搵笨，續言：「大佬!佢叫我客串兩日，拍咗兩個幾月，但真係收兩日錢，佢幾無良，最無良係……咁佢話俾你聽人係講口齒，佢話客串，好呀!咁我以為兩日，就開兩日嘅錢，佢真係俾兩日嘅價錢我，足足做咗兩個幾月，你話我呢個人幾笨，所有人都睇錯我，我係一個鱷魚頭老襯底嘅人。」
阿叻大聲講：「我冇收入嘅!」記者問係唔係老婆養，阿叻諗都唔諗就話：「梗係喇!我係唯一一個靠旺夫而生存嘅男人嚟，如果第二個娶到黃杏秀，我就做乞兒，佢買馬又中、買股票又中，買樓都掂。」
「我講呢兩年想間屋裝修，佢話唔好住酒店，喺對面買個單位，o依家市價升咗3倍，佢都唔等錢使，賣嚟做乜，佢得閒去馬會求其隊張飛仔嚟去，又拎現金，呢個世界真係好鬼得意，佢唔係人，係仙女下凡，啲馬養佢，因為佢屬馬，屬馬嘅人一定要賭馬，呢句我講嘅。」
阿叻我成日講：『小賭可養妻活兒，大賭可救國興家。」呢句係我嘅台詞，點知被王晶用咗喺劇中，係咪好笑，但呢啲係真!」