支Mic勾到上衣20歲丞延@CLC意外走光露Bra

【蘋果日報】韓國「馬舞女」泫雅嘅同門師妹團Crystal Clear（CLC）於前年出道，去年加入香港成員莊錠欣（ELKIE）及恩彬改組成7人女團，重新出發。雖然今年初食住人氣劇《鬼怪》個熱潮，推出同名主打歌《鬼怪》而引起話題，不過負評居多。CLC於今年8月再推出新碟《FREE'SM》回歸樂壇，依然冇乜討論度，不過近日CLC就因為20歲隊長丞延表演時唔小心走光嘅影片而引起關注。
據短片顯示，CLC於上月16號擔任由國防弘報院舉辦嘅馬拉松比賽嘅表演嘉賓，當日仲有女團Dreamcatcher、Sonamoo、洪真英等人亮相。CLC7位成員以夏天Look示人，大方露腰、晒腿，不過因為太大風，7位成員嘅頭髮都吹到亂晒，件衫都飛吓飛吓。同時亦疑似因為太大風嘅關係，當CLC演出歌曲《Summer Kiss》時，丞延手上嘅咪就勾到件衫，上衣就因為佢舉高手嘅動作而越拉越高，導致丞延走光露Bra，不過丞延就冇因為突發狀況而嚇親，繼續敬業面帶笑容演出。