【明報專訊】新世界發展（0017）昨日發新聞稿，話陳觀展明年元旦起接替元老「堅叔」梁志堅做總經理。小琴睇吓陳嘅履歷，新聞稿介紹佢來自廣州，並曾執教於廣州華南理工大學，仲話佢擁有超過10年在政府部門嘅工作經驗，在廣州市政府擔任處長等職務，理論和實踐經驗並重。
睇嚟，新世界都相當有興趣羅致前政府官員，而現時招攬內地前官員當要職，莫非預示旌旗將更指向神州？
「純官」鄭家純表示，期望接任人為集團管理層注入新嘅動力，他話「隨着集團引進新的管理專才，將可大力革新集團的管理，引進全新的管理思維和模式，從而提升新世界集團的整體管理質素和在市場的競爭力，為集團的發展開創新的一頁……」。嘩，不斷咁話革新、提升、新一頁，講到堅叔家的管理，有好多空間要大執咁喎。
小琴為進一步了解陳觀展，上網搵咗一輪，發覺資料唔多，連照片都搵唔到一張。最新嘅一則係廣州越秀集團，於本年9月20日「報請廣州市人民政府黨組會議同意，免去陳觀展同志的越秀集團副總經理、越秀企業（集團）有限公司副總經理的職務」，相信陳當時已決定加入彤叔馬房。
離職經市府黨組同意
陳現年約51歲，2004年加入越秀企業（集團）有限公司，歷任資本經營部總經理、越秀財務有限公司總經理，07年曾獲委任為越秀交通（1052）的執董，擁有廣州中山大學理學學士學位及廣州華南理工大學環境化學工程工學碩士學位，擁有大學講師、高級工程師資格等資格。不過，新世界用文字就好詳細形容陳觀展，但偏偏又無附連佢嘅照片，所以各位都係等佢上咗任至可見到佢嘅真身啦！
年屆71歲嘅堅叔日前與小琴閒談，話由於會繼續擔任集團顧問，所以佢仍會繼續喺新世界返工，他表示佢嘅工作，「無一年半載也交帶不完」，着大家仍然可以致電新世界找他。
與堅叔同日榮休的仲包括財務總監周宇俊；另外新世界工程總經理周桂昌則會於明年3月1日榮休，新人選將於明年2月到任。
報料電郵﹕piano@mingpao.com
