四洲11種食品含致癌物

【明報專訊】卜卜脆零食係唔少香港人至愛，但噚日消委會公布，呢啲香口嘢差唔多全部都含致癌物「丙烯酰胺」，有神經毒性，都咪話唔得人驚。出品唔少零食嘅四洲集團（0374）當然走唔甩啦，至少有11種食品榜上有名，包括小琴由細食到大嘅卡樂B同甘大滋，不過唔知係咪個市仲未「消化」，噚日四洲股價仲錄得3個月最大升幅。

消委會呢份「致癌零食」名單真係唔嘢少，可謂中外零食通殺，其中由卡樂B四洲出品嘅薯片、蝦條、粟一燒；四洲自家出品嘅脆脆蝦餅、甘大滋、紫菜梳打餅，全部都不能倖免。四洲經營嘅著名品牌固力果百力滋同百奇餅乾條、童星點心麵、好侍通加利粟米筒，同埋專攻細路仔市場嘅金必氏愉快動物餅，統統驗出含有「丙烯酰胺」。

而旺旺（0151）出產嘅芝士餅米果，同埋小小酥亦驗出含有少量丙烯酰胺。雖然相比榜首嘅珍珍薯片每公斤含3000微克丙烯酰胺，上述四洲零食嘅相關含量都只係幾十至幾百微克，但係食物安全中心話，丙烯酰胺對實驗動物同人類都有神經毒性，會影響實驗動物嘅生殖同發育，增加動物出現甲狀腺、腎上腺、乳腺、睾丸嘅腫瘤機會。

呢啲「不利消息」對食物飲品股價影響唔可以忽視，但噚日四洲嘅股價不但無跌，仲升咗5.6％收報2.45元，旺旺就跌咗1％收報6.69元，但係各大股民「消化」完今日嘅消委會報道之後，會唔會開始喺個市度反映「憂慮」，小琴就真係唔敢諗喇。