十優唔係乜都識敢言麥明詩被踩戲屎

【蘋果日報】「十優港姐」麥明詩(Louisa)自從參選港姐奪冠之後，一路都被大台重用，喺主持方面嘅表現，都算稱職，但係喺處女作《賭城群英會》嘅演技就被網民批評到慘不忍睹，麥明詩之後出席活動被問到「死魚眼」，佢話：「我雙眼呈待機狀態係弱點，我起身會練習開合眼10次。」
麥明詩嘅第二套作品《使徒行者2》，雖然佢喺頭段嘅戲份唔多，不過話晒係新晉小花之一，大台其實都俾咗唔少機會佢發揮，麥明詩同魏焌皓喺劇中都有唔少嘅談情戲，雖然如果要佢做當家花旦就似乎仲需要多加練習，但係其實都睇得出麥明詩有努力過。
《使徒行者2》作為台慶劇，故事情節依然離不開搵黑警、搵臥底，不過值得留意嘅係，原來只要唔談情說愛，改為做啲要用腦嘅嘢，睇落麥明詩係順眼好多，喺劇中本來話係做財務公司職員嘅麥明詩，一直幫張兆輝調查有冇警員涉及借貸，再搵出邊個係黑警，喺搜證過程裡面，麥明詩睇落又好冷靜，同談心個樣簡直判若兩人，但係轉個頭三哥問佢仲愛唔愛魏焌皓，心情應該係好複雜，不過睇完佢嘅演出，似乎佢都要喺感情戲呢方面落多啲功夫喇。
嚟緊麥明詩喺大台仲會有兩套戲，分別喺《誇世代》中擔任女配角，以及《是咁的，法官閣下》擔任第二女主角，同眾多老戲骨同場較量，壓力都咪話唔大，不過以麥明詩咁高EQ嘅性格，相信佢都可以應付得到，話唔定仲可以喺各位前輩身上側師成功，有令人耳目一新嘅表現呢。