當李彩華遇上李彩華　大家都係音樂人

【蘋果日報】李彩華，大家一定會諗起「李彩華着白色小背心，正！」呢一個帖，不過入到個去見到嘅，唔係女星李彩華（Rain），而係香港海鮮業聯合總會主席嘅李彩華先生。其實喺舊年，李彩華同李彩華真係見過面喇。
當時兩位李彩華接受《蘋果》訪問，當日Rain去到香港仔魚類批發市場，李生一見Rain即握手：「11年喇，今次終於見到真人！你喺國內拍嘢唔忙咩？仲要你嚟啲咁污糟邋遢嘅地方。」Rain回答「原來都唔知有成11年咁耐，都冇數過。近排咁啱喺香港，可以過嚟呢度，呢度比我想像中乾淨，乾淨過街市。」
Rain係音樂人就係人都知，但原來李生都係音樂人，李生話自己組咗隊band，負責吹色士風、口琴，仲即場用口琴吹咗首《月亮代表我的心》，Rain馬上同佢jam歌，李生大讚Rain好唱得，唔唱歌嘥咗；Rain冇諗過李生咁厲害，原來係音樂世家。