Moka產後首現身城城見法王為囡囡祈福

【蘋果日報】51歲郭富城上個月公佈生咗6磅B女後，就變咗深閨爸爸，留喺屋企同老婆方媛(Moka)一齊湊女。而Moka自出院後，一直未有現身，就連平時有打理開嘅網店，亦有一段時間冇再更新。直至上周五(13日)，向來篤信密宗嘅城城，趁薩迦赤津法王來港舉行開光同灌頂儀式，即帶埋啱啱坐完月嘅Moka出席。網上流傳城城兩公婆參加儀式嘅短片，產後首次現身嘅Moka比未陀B前，身形相對較圓潤飽滿，流露幸福神情。片中Moka不時好奇拎住手機影會場環境，又影老公。反而城城就誠心雙手合十，表現虔誠。之後兩公婆獲安排同薩迦赤津法王單獨見面，城城仲趁機為女兒祈福，求闔家平安。至於同城城同場嘅，仲有佢兩位老友邱淑貞同袁詠儀。