同王浩信傳緋聞後傳蔡思貝做宅女洗底

【蘋果日報】蔡思貝一向電力驚人，每次拍劇都惹緋聞，性格一向爽直，同異性玩得埋又冇避忌，有指排舞師男友麥秋成決心同蔡思貝斬纜，之前更爆出蔡思貝同人夫王浩信傳緋聞，王浩信離奇喺蔡思貝位於北角嘅寓所停車場現身，疑上樓逗留兩粒鐘，連日王浩信否認緋聞，老婆陳自瑤就一直「封口」只係喺微博放一啲自拍相，日前兩公婆出席活動，力證情不變，陳自瑤話因為要搞囡囡升學嘅嘢，有好多資料要睇，先冇時間覆。
咁蔡思貝呢，自從爆出緋聞後，就冇再更新社交網，有報道影到蔡思貝近日外出都心事重重，日前約家人去康怡一間餐廳食飯，蔡思貝爸媽一臉嚴肅，未知蔡思貝係唔係受近日負面傳聞影響，一向健談嘅佢，反而好少講嘢，間唔中就撳吓手機，講嘢都係一句起兩句止，據報道指蔡思貝近日返咗杏花邨屋企住，做宅女「洗底」，雖然被影到多次喺北角嘅寓所附近現身，但蔡思貝就唔認喺嗰度住，相當神秘。