同劉愷威網上放閃楊冪扮蠟像唔怕歷史重演

【蘋果日報】劉愷威同楊冪喺內地各有各忙，聚少離多，屢傳兩人離婚消息。不過，上周五係劉愷威嘅43歲生日，老婆楊冪踏正凌晨零時喺微博祝「糯米」(囡囡暱稱)爸爸生日快樂，劉愷威喺3分鐘後速回貼三個心回應，似乎想以行動粉碎婚變傳聞。
日前內地傳媒廣傳一條片，片中楊冪現身北京一間蠟像館為自己的蠟像揭幕，見佢心情大靚，即興扮蠟像嚇一班參觀者。唔知話楊冪真人好似蠟像？定蠟像整得太似真人？楊冪擺咗個叉腰擺士扮蠟像，每當有人行埋去影相，佢就會同影相嘅人一齊做V字手勢，其他人信以為真，嚇到彈開，其中一位男士更不停拍心口話怕怕。反而，楊冪個樣好鎮定，笑不露齒，只係表情有啲生硬。多個內地網媒陸續分享呢條片，但其實呢條片已經係舊聞，發生於去年7月5日，內地傳媒將舊聞無限loop唔係今日嘅事。