【馮仁昭四圍超】麥嘉欣公主裙　出戰國際小姐　

【蘋果日報】今年國際小姐，香港代表並唔係由無綫派出香港小姐出戰，而係由「澳門選美連盟」選出王詠珩代表香港出賽，噚日佢孖住澳門代表麥嘉欣一齊飛去日本，參加下月14日喺東京Dome City Hall舉行嘅「2017年國際小姐」。
王詠珩同麥嘉欣原定下午1點起飛，但因為日本打風，飛機遲咗5個鐘先可以飛，王詠珩話：「噚晚同嘉欣，仲有屋企人、之前參賽嘅佳麗一齊開慶祝會，佢哋為我哋打氣。」
賽前學茶道
下月14日先比賽，點解預早咁多去日本？王詠珩話：「我同嘉欣會一齊先拍廣告，之後去東京學茶道。」提到佢之前好擔心泳衣環節，佢話：「我係驚少布會走光，之前喺香港訓練，所有人叫我克服佢，之前私私縮縮，依家大方自然好多，我準備咗一套，因為決賽先要着。」
澳門代表麥嘉欣就話心情好興奮：「最有信心係晚裝環節，自己好鍾意粉紅色，所以設計師設計咗一條公主裙畀我，泳衣就係簡單款式。」佢同王詠珩會有一個跳舞的表演環節：「已經排得好好，依家我哋嘅關係好似屋企人。」
撰文：馮仁昭