【馮仁昭四圍超】等死因報告陳自強契仔未平復

【蘋果日報】成龍前經理人陳自強（Willie）前日凌晨喺西貢寓所於睡夢中離世，享年76歲。陳自強兩年前因心臟病入院後，出入靠坐輪椅代步，平日由契仔徐君俊（Geoff）貼身照顧，據知Willie身後事會由演藝人協會同契仔Geoff打點。
張立基惋惜
Geoff自契爺離世後，前晚喺社交網悼念，除貼出同契爺嘅合照，又以英文留言：「與契爺一起，無論天堂或世界任何角落或任何地方。」Geoff仲話因為太傷感，所以未有回覆所有來電同短訊，有死因報告後會交代。而成龍同房祖名都分別喺社交網貼文悼念陳自強。
此外，張立基前晚喺九龍灣現身電影首映，佢話喺90年代曾經簽畀陳自強，仲話當年啱啱離開亞視，同陳自強合作咗三年，後來因為離開香港冇再簽約。張立基話聽到陳自強離世嘅消息都好愕然，佢話：「好可惜、好愕然，有啲惋惜見唔到佢最後一面。好耐冇見佢，呢一、兩年都有聽過佢有病，可惜冇時間見面，佢係一個好nice、好照顧藝人嘅人，當年好照顧我。」
撰文：馮仁昭