港姐玩公投陳偉琪獲神秘契爺Call傳媒拉票

【蘋果日報】陳偉琪（Vicky）係2013年港姐候選佳麗之一，當年佢嘅對手，統統都係猛人，冠亞季軍分別係陳凱琳、蔡思貝同劉佩玥，仲有唔入三甲但至今都有名嘅劉溫馨、歐陽巧瑩等等。
不過，當年除咗大熱門陳凱琳外，Vicky都可算係話題人物之一，話說當年大會搞全民投票，賽制係觀眾透過指定手機應用程式投票及大會評判評分，各佔百分之五十，所以指自己甚少朋友喺香港嘅Vicky，已多次聲稱會叫親戚朋友投票，喺決賽前夕，更有一名自稱是Vicky契爺Eddie的男士去信報館，叫所有人投Vicky一票。
其後Vicky承認有名契爺叫Eddie，佢仲話「拉票好正常，我啲屋企人都有叫人投票，我諗佢唔會做呢啲咁嘅事，可能有人假冒佢，佢唔會用呢個方式咁做，而且我絕對冇叫人咁做，亦唔需要咁樣去拉票。」
可惜結果不如Vicky同Eddie先生嘅期望，Vicky喺觀眾投票得分上，只係喺十強佳麗中，佔到5.58%，連同大會評判評分，最後Vicky都係排第五位，未能當選。