張曼玉任影展評委　李施嬅衝出大台拎影后

【蘋果日報】香港小姐競選向來都係發掘娛樂圈人才嘅地方，一向以「美貌與智慧並重」嘅香港小姐，外貌就梗係唔使講夠晒出眾，而智慧方面其實都有好多方面嘅體現，而當中，演藝才華就係其中之一，睇番咁多屆港姐，雖然冠軍得一個，但係只要你有才能，其實喺香港娛樂圈都有機會發圍。
張曼玉
1983年參選香港小姐得到亞軍嘅張曼玉，由84年開始涉足影壇，到現時大大話話都拎咗五屆金像獎影后、四屆金馬獎影后，連柏林電影節、康城影展都拎過影后，仲勁到多次擔任國際影展嘅評審，實力派演技無容置疑。
蔡少芬
今年44歲嘅蔡少芬於1991年以17歲之齡參選港姐獲得季軍，至今依然保持最年輕香港視后紀錄嘅佢咁多年嚟作品無數，最近幾年仲轉戰內地電視劇，演技真係「震驚十三億人」，喺內地有唔少Fans。
佘詩曼
42歲嘅佘詩曼喺1997年參選港姐得到季軍，多年喺電視界打滾，獎項多到數唔晒，視后級演技得到唔少讚揚，喺中港兩地都紅到出汁。
李施嬅
原本叫李詩韻嘅李施嬅喺03年由加拿大回港參選港姐，可惜大熱倒灶五甲不入，不過佢都順利加入大台，歷年都有唔少作品，不過喺香港都算受歡迎嘅佢喺大台都未成功拎到視后，之但係今年佢喺美國拍咗套《Once More》短片，奪得European Cinematography Awards同Los Angeles Film Awards嘅最佳女主角，揚威海外，成為雙影后。