香港打造 「綠色」機場

【明報專訊】香港近日突然「急凍」，唔知同地球暖化、氣候變異有冇關係。機場管理局噚日同40個業務伙伴，一齊承諾到2015年，機場每工作量單位（即每名旅客或每100公斤貨物）嘅碳排放量，將較2008年水平低25%。

參與呢項環保活動嘅包括﹕航空公司、貨運商、機場酒店、入境處、天文台等，同機場有密切關係嘅部門、公司。機管局會從光管、製冷系統着手，改裝環保裝置，仲會揀啲慳油車，又會建設綠化天台、太陽能電池板同風力渦輪。其他參與機構，不外乎辦公室空調25.5度、用環保紙、改用節約能源電器等，未見有創意嘅橋。計小琴話，如果飛機乘客都可以參與，航空公司可以諗吓乘客唔要飛機餐，票價有扣減，既唔浪費食物，乘客又可以受惠。