又話禁韓？大陸媒體全程直擊婚禮　網民怒轟

【蘋果日報】昨日韓國娛樂圈有雙宋世紀婚禮舉行，來自中港台及其他亞洲地區嘅傳媒都有到當地採訪，雖然大陸去年實施「禁韓令」，不過話就話禁韓，但事實上大陸演藝圈就勁鍾意韓國嘢，好似成日抄襲韓國綜藝節目咁，至於憑《太陽的後裔》而喺大陸勁Hit嘅雙宋，雖然因為「禁韓令」就冇得搵銀，但佢哋對於昨日雙宋結婚呢單新聞就勁重視，有幾間電視台都派人到當地採訪。
不過今次大陸傳聞過度關注雙宋婚事，就似乎令韓媒相當不滿，事關大陸傳媒嘅採訪方式就有別於韓媒嘅做法，當中有大陸傳媒更喺婚禮現場全程直擊，更進行直播，令到各地粉絲都可以同步睇到雙宋嘅婚禮，當中更吸引幾十萬人觀看，非常誇張。
而且大陸傳媒嘅直播亦令到雙宋婚禮現場照片喺網上瘋傳，當中搞到有部份韓媒更因為未能第一時間拍得雙宋照片，所以就轉載大陸傳媒嘅照片，韓媒亦廣泛報道有大陸傳媒以偷拍形式進行直播，並推測大陸傳媒入住酒店有利位置方便拍攝。韓國網民對此就議論紛紛，仲覺得大陸傳媒以偷拍形式進行直播，事前冇得當事人同意，咁樣做法就似乎有欠道德。