章子怡參加雙宋婚禮同喬妹撞色被轟

【蘋果日報】韓國神劇《太陽的後裔》嘅宋仲基、宋慧喬，大前日喺首爾新羅酒店舉行世紀婚禮，吸引大批媒體到場採訪。而曾與喬妹合作電影《太平輪》、《一代宗師》嘅章子怡亦受邀出席婚禮，不過章子怡嘅行為及服飾就引起韓國網民批評。
當日章子怡成為首個到達婚禮場地嘅賓客，不過佢到埗後率先於微博公開與新郎宋仲基嘅合照，又於婚禮後公開與雙宋的頭貼頭合照及場地照，被網民批評太高調。
而韓國方面亦相當注重賓客出席婚禮嘅服飾，據悉象徵純潔嘅「白色」係屬於新娘嘅顏色，賓客如同樣穿上白色則視為大忌，所以賓客應避免穿上白色衫，所以當日可見大部分賓客都係穿上黑、灰、紫嘅顏色，但章子怡當時身穿黑白相間嘅連身裙，合照時更披上白色大衣企喺雙宋中間，被韓國網民狠批「唔禮貌」。不過亦有網民稱「只係文化差異」，事關中國傳統喜慶事上一定穿上鮮色嘅服裝，反而會避免黑、灰等深沉嘅顏色。