大美人嘉欣BB同古仔同年阿Sa出年30有6喇...

【蘋果日報】熊黛林(Lynn)同郭可頌剛剛結婚一年，終於成功造人，明年佢哋就榮升做爸爸媽媽，真係可喜可賀！明年係狗年，即係話阿Lynn嘅小寶寶就係狗BB喇！查實圈中亦有唔少出名嘅藝人，生肖都係屬狗㗎！
湯鎮業、苗僑偉、梁家輝(1958年)
五虎成員嘅湯鎮業同苗僑偉，唔係屬虎，屬狗至真。不過佢兩個依然活躍娛圈，橫睇直睇，睇唔出有邊忽似就嚟60歲喎。除咗三哥同湯鎮業，仲有影帝梁家輝都係屬狗㗎！
古天樂、宣萱、李嘉欣(1970年)
屬狗嘅古天樂，亦係圈中出晒名嘅愛狗之人，佢曾經話過狗狗係十分有靈性嘅動物。同古仔份屬老友嘅宣萱，原來佢哋係同齡，大美人李嘉欣，明年48歲，但睇落佢真係唔似囉！
蔡卓妍(1982年)
時間過得真係快，原來阿Sa都就快踏入第三個生肖循環，即係36歲。不過樣貌依然同初出道時冇乜點變。