【馮仁昭四圍超】張名雅身材回勇　生B延後

【蘋果日報】已為人妻嘅前港姐張名雅，噚日以代言人身份到將軍澳出席一間產前產後護理服務店嘅開業剪綵，佢囝囝已經7個月大，張名雅沾沾自喜話自己已回復當年選美身材，三圍係34、23、34：「產後3周開始紮肚10日，收到盆骨，好有效，着得番以前貼身嘅牛仔褲，因為之前坐月要補身，加上又要餵奶，唔可以唔食嘢減肥。」佢仲話要照顧囝囝同事業，短時間都唔會再生B。
失婚嘅陳煒性感谷胸，佢笑住話：「應該啦，人哋開張要裝扮吓。」問到有冇多咗追求者？佢話：「facebook多咗陌生人add我，留言話支持我想認識我，我幾廿歲唔會上當，雖然有撳入去睇相，不過睇完就算。我唔要識下廚嘅小鮮肉，最緊要係講feel，不過都未遇到。」更坦言同前夫仍有聯絡，關係依然好好。
李蘊自嫌太瘦
騷美腿嘅李蘊透露生完囡囡後，腰圍由40吋極速減咗17吋：「我覺得自己太瘦，媽咪都覺得我瘦得唔健康，所以我要養好身體，肥多8至10磅，等囡囡兩歲先考慮再生。」