【馮仁昭四圍超】梁焯滿護新歡驚爆前妻病逝

【蘋果日報】港姐季軍梁佩瑚弟弟、三級片導演梁焯滿被雜誌指控背妻偷食，搭上芭蕾舞老師Jessica拖手行九龍塘，焯滿喺03年娶陳靜霞（Bonnie），兩人育有9歲兒子。對於被指包二奶，焯滿喺電話激動爆粗：「包乜二奶？佢都亂X咁寫，佢寫嗰啲唔係事實。」
焯滿話啲相係一年前影嘅：「我依家頭髮都長晒，條片起碼一年前。」問到一年前被偷拍，當時都係人夫身份？焯滿至驚爆已離婚多年，前妻上月離世：「陳靜霞啱啱30號先至上咗山，我哋06年因了解而分開，之後佢改嫁咗。Bonnie係腦中風，47歲咋，我哋一直有聯絡，自己心情啱啱平復冇耐。」
唔存在包二奶
對於Jessica被冠上「情婦」之名，焯滿強調：「我同陳靜霞已經離咗婚，唔存在包二奶，係咪拍拖我唔需要回應，我冇所謂，但唔好影響我身邊人，我只係講一句，佢唔係小三，係芭蕾舞老師。」焯滿拒透露現時兩人關係：「拍唔拍拖唔影響，唔通下個月譚筠怡返嚟同我拍部電影，又話我哋復合咩，我係有意邀請筠怡返嚟。」
撰文：馮仁昭