賣魚只係副業「御用收數佬」黃文標：我冇轉行

【蘋果日報】1989年加入無綫、專做收數佬兼反派嘅黃文標，佢喺13年離開大台，轉投港視，標哥喺13年接受《蘋果》嘅訪問，講到拍劇咁多年，雖然當年佢喺《尋秦記》飾演「滕翼」一角最多人識，但係標哥話佢最鍾意嘅角色係《學警狙擊》「田七」一角，佢話：「因為完全改變晒我嘅形象，駁長髮，對我嚟講幾新鮮。」
嗰陣港視招攬咗唔少綠葉王，雖然當時唔少人以為可以有新衝擊，但係最後發牌夢碎，有啲人選擇回巢，又有人選擇繼續自由身外闖，當然發展未必話有好機會，但係叫做可以做啲自己想做嘅事！
昨日有周刊報道，回復自由身嘅標哥，喺呢段時間靠積蓄過活，其間返過大陸拍網劇兼客串電影，因為好鍾意做戲嘅關係，所以佢仍然堅持拍戲係正職，喺冇工開嘅日子，佢走去兼職過活。o依家佢走咗去揸車賣魚，標哥接受周刊訪問，佢話最怕啲人以為佢轉咗行，查實正職依然係拍戲，只不過呢份副業開工嘅日子比正職仲要多！
講到目前嘅生活，標哥話覺得喺香港有手有腳就可以生活，只要肯做就得，所以佢一啲都唔覺得徬徨，佢又話自己唔介意被定型做惡霸，反而覺得係一個肯定！