先達搜索iPhone X　吳若希高調格價

【蘋果日報】【爆相爆片】吳若希（Jinny）為老公Alex Ho生咗囡囡Giselle，養尊處優一排，最近又再活躍幕前，早排仲俾《蘋果》讀者見到佢喺旺角先達睇全城注目嘅iPhone X手機㖭！產後復出嘅Jinny，前日被《蘋果》讀者黃先生，透過「爆相爆片」，目擊Jinny喺旺角先達睇手機嘅過程，黃先生話：「夜晚7點幾，吳若希同個女人入咗商場，嗰陣有好多人望住佢，不過佢冇乜點理，繼續周圍行，佢哋先後行咗入去三間舖頭格價。」


打電話報價

咪睇Jinny嫁個澳門闊少老公，但買嘢一樣好精打細算，格晒價先，不過最後都買唔成，黃先生繼續話：「佢問完價錢之後，打咗個電話同人匯報，聽到佢話iPhone X要11,000蚊，過咗5分鐘左右，佢同個女人就走咗，最後梗係冇買到電話啦。」就喺本報讀者黃先生影到Jinny嗰晚，Jinny喺Instagram貼圖，佢哋星夢團隊為今個月生日嘅同事慶祝生日，有老闆何哲圖、鄭俊弘、何雁詩、周柏豪、菊梓喬（Hana）等，唔知佢初時係咪諗住買部iPhone X送畀老闆做生日禮物呢？