【馮仁昭四圍超】切除部份肺葉　譚小環老公醫肺癌

【蘋果日報】譚小環噚日同林奕匡喺油塘出席職健安健活動，原來佢老公蔡強榮（Eric）之前突然消瘦，之後入院檢查，發現患上早期癌症，小環話：「佢之前患肺癌，檢查身體時發現，係一期，最初期，10月底做咗手術，手術後喺醫院休息咗7日，唔使化療、電療，啱啱7號出院，喺屋企休養咗一星期，身體活動能力等等都已回復九成以上。」小環話Eric之前發燒、傷風、感冒，去身體檢查發現肺癌，又話：「老公切咗右邊上下肺葉嘅一半，又將唯一壞習慣食煙戒咗，依家健康為主，休養吓。」小譚因頻撲照顧老公，瘦咗8到10磅。
決心戒煙
Eric發現患上1A期肺癌，立即做手術，佢日前喺facebook貼出院相報平安：「毋須進行任何化療，電療等療程，只要定期覆診，檢查就可以了。」Eric噚日氣若游絲回應：「由9月發高燒入法國急病室，足足兩個月。真係命大，不幸中之大大大幸，大步檻過。」Eric仲因為咁堅決戒煙同多做運動，保持健康。
撰文：馮仁昭