陳豪再晒森美合照網民：Waiting for that kiss

【蘋果日報】戀愛係無分國界、性別，就好似森美同陳豪喺劇集《跨世代》嘅一段疑幻似真嘅「hehe情」，不但冇令觀眾反感，反而仲有好多幻想空間，希望佢哋「在一起」。
昨日陳豪再喺微博放閃，放咗好多張佢同森美嘅黑白合照，兩個型佬走埋一齊「基味」甚濃，陳豪留言：「《誇世代》之『大頭B與笨蕉』攝影專輯。」呢個專輯又點少得佢哋嘅訂情電單車先，見到陳豪就依然係「騎着電單車的黑皮褸」咁擺晒甫坐係電單車，森美就一手攬住...唔係陳豪，而係頭盔，兩個都唔望鏡頭，扮晒型咁影相。好多網民見到啲咁甜嘅合照，當然就留言贈慶啦。
昨日《蘋果》就聯絡咗森美，問吓佢有冇諗過大家咁接受呢段「hehe情」？森美就話「唔係「hehe」嚟嘅，係好撲朔迷離嘅感情，其實係講友情，呢個導演用咗搞笑方法嚟表達友情、好兄弟。」追問佢哋會唔會有情人終成眷屬？森美就大賣關子：「我係咁send啲片俾啲好兄弟，係好兄弟嘅感情。」