新聞類別
財經
詳情#
【明報專訊】即將喺今個月底卸任既匯控（0005）集團行政總裁紀勤，臨別匯控前接受咗一份英國報章專訪，除咗為佢37年匯豐生涯作一個總結，亦剖白咗好多鮮為人知嘅趣事，就連佢自己既絕密瘦身大計亦唔介意同大家分享。
幾個月前，匯控上演咗一場畀電視連續劇仲要精彩的高層大換班，更有好多關於高層之間權力鬥爭既謠言滿天飛。紀勤就藉着訪問，間接否認自己以辭職作威脅，以達到繼承主席之位既目的。
認同升范智廉係好決定
紀勤重申，今年7月底當前任主席葛霖同佢講，主席及行政總裁辦公室應分別長駐倫敦及香港時，佢已經意識到自己唔會被擢升為主席。及至今年9月，佢同匯豐高級獨立非執行董事駱耀文共晉晚餐時，對方告知范智廉將會成為新任集團主席，佢個人亦認同呢個係一個好決定，儘管董事局作出挽留，但佢建議由歐智華擔任行政總裁一職，以組成新管理班子。
訪問中，紀勤仲透露咗佢入行經過，全因當年紀勤媽媽睇到一輯匯豐招聘廣告，繼而幫佢投寄應徵信而促成美事。
卸任後，紀勤會繼續以顧問身分受聘於匯控，直到明年3月底為止。紀勤話，有來自世界各地的機構向佢招手，但佢仲未作出決定。
同人賭100萬 要減磅20公斤
不過，可以肯定既就係紀勤為咗行善，同香港一個企業家打賭100萬，冀減磅20公斤，為咗達成目標，佢仲話會參加紐約馬拉松添。
小琴相信，如果紀勤真係減磅成功嘅話，除咗各大金融機構有興趣羅致紀勤之外，佢分分鐘會成為纖體界最想邀請嘅代言人，到時可能會創造另一天價廣告酬勞紀錄。
報料電郵﹕piano@mingpao.com
回應 (0)
