美聯「一人一信」 僅21人撐場

【明報專訊】上個月19日，政府突然宣布遏抑物業短期炒賣新招之後，巿場交投馬上放緩，地產代理業界話要舉行遊行等活動作出抗議，其中龍頭大行之一嘅美聯物業（1200），雖然話不支持遊行咁激嘅行動，但係佢哋要用收集巿民一人一信意見嘅方式去轉介畀政府。

剛過1個月，滿以為美聯收信會有好大收穫，點知佢哋噚日開記招講結果，原來收番嘅信只有21封。全港巿民人口有成700萬，只有收番21封信，佢哋嘅意見係咪會好矜貴呢？又有幾高代表性呢？

收信少 「反映用家情緒穩定番」

咁少信，美聯又點解畫呢？高級執董黃錦康話，發信巿民都係用家，即係就算以用家嚟講，今次對政府新招無巿場預期反應得咁大鑊。黃董仲引用美聯從收集35個屋苑資料顯示，政府上月19日出招後，由11月29日（周一）開始至12月19日，以每7天一周計，由首周收到11封信，至次周、三周分別收到8封及2封，逐周減少；但同期三周之內，物業成交由首周119宗升至第二、三周每周200多宗。

黃又話，上述三周內收信少咗，成交物業多咗，反映用家對新措施嘅情緒反應逐步穩定番而開始入番巿。佢希望政府如果第日出招，咪好似今次咁突然，事先宜向業界諮詢兼要探聽民情。