陳德霖返母校

【明報專訊】成功非僥倖呢啲說話，大家都耳熟能詳，金管局總裁陳德霖上周五出席中文大學碩士課程畢業禮時，都忍唔住苦口婆心咁勸導一班同學仔，努力係踏上成功之路嘅入場券，仲用咗蓋茨同披頭四做例子講解，雖然道理無新意，但堂堂師兄嚟到，同學仔都會留心聽啩！

陳德霖1976年中大畢業後加入政府，唔知佢重返校園有咩感覺呢？中大有堂堂金管局總裁作為畢業生，又做埋畢業禮嘉賓，都算巴閉。陳德霖喺典禮上分享外國作家Malcolm Gladwell著作《Outliers》裏面提到嘅1萬小時理論，包括微軟蓋茨細細個未開公司前，已有足足8年實戰電腦軟件經驗，而披頭四樂隊未紅前亦喺一間寂寂無名嘅夜店表演咗足足270個夜晚。陳德霖話，就算係天才，本身唔夠努力都唔會成功，寄語年輕人一遇到機會就要努力累積經驗，就會接近成功多一步。