好戲之人聚首86歲劉兆銘開心晒V

【蘋果日報】黃秋生、劉青雲、吳鎮宇、張達明同劉兆銘(Ming Sir)都係好戲之人，佢哋最近就相約一齊食飯，秋生昨日於facebook上載一張大合張，留言：「世紀相聚！」
講真，呢個組合又真係幾難得，有網民形容呢個簡直係鑽石級陣容，好希望佢哋可以合作開拍一部新戲。86歲嘅Ming Sir依然好精神，佢除咗好戲，喺圈中人緣都非常好，所以大家都好尊敬佢。四位後輩圍住Ming Sir合照，見佢笑晒口仲擺出咗好似V字嘅手勢，而青雲就用手遮住個嘴，含羞答答咁嘅樣，非常搞笑！而達明因為曾患癌，康復期都需要一段時間，見佢明顯比以前瘦咗好多，但都豎起手指公，個樣都好精靈。