事業經歷高山低谷吳浩康在侮辱中成長

【蘋果日報】【我們的演唱會】吳浩康（Deep）參加歌唱比賽入行至今15年，因歌藝被賞識，以為前途無可限量，卻因為走錯一步，事業未上高峯便跌進低谷，加上是非、緋聞，多年來在圈中半浮半沉。自言曾被前經理人侮辱的Deep，年前開始在網上做直播演唱，終於打動樂迷心，再有機會踏舞台舉行演唱會，縱使走來不易，但付出努力，總算見到成果。
吳浩康初出道時被冠以「靚仔版陳奕迅」稱號，可惜04年因藏毒罪成，事業插水，之後每次有新聞都是負面，難得他一直未忘初衷，由他一手策劃的「Deep Night Show」大受歡迎，透過facebook直播以歌會友，人氣回升，下月更在九展Star Hall舉行兩場首次個人演唱會。
面對公司不離不棄，Deep當然感恩，但說到剛入行時，他坦言自我價值很低：「有冇心雄過？冇喎，反而啱啱入行有人以為我心雄就去胡亂過生活，其實反而唔係，係另一個狀況，自我價值好低，覺得自己唱歌唔好，入行前以為自己都幾好樣，但同其他人放埋一齊，自己係乜？」
唔會丟低粉絲
Deep又爆當年曾被某些經理人公司同事，用頗侮辱的方式跟他相處，他說：「佢可能唔想我囂啩！我依家可以話已經原諒咗，但都係接受唔到，一個男人牛高馬大俾個女人侮辱，個烙印好深，但自己做錯嘢就唔可以賴人哋，有啲嘢發生過就係發生過，冇諗過要人哋去改變睇法，睇吓大家能唔能夠接受番，或者去接受我嘅新作品同埋我囉！但嗰個人已經離咗職喇。」
至於身邊可有朋友離他而去？朋友多了還是少了？Deep嘆謂：「冇多冇少，不過經過學習、教訓，隨日子有少少成長，會慢慢了解一啲誤解咗係朋友嘅對象，原來唔係朋友。」下月開騷，他因為要專注綵排而暫停facebook直播，但他講明完騷後翌日會繼續：「呢年幾每個星期喺facebook開live，儲到班忠實fans撐到我開騷，所以完咗騷會開始番，唔會因為上咗個台，就丟低支持我嘅人。」
父子變得親密
支持Deep的除了樂迷，還有父親。過往跟父親甚少溝通的Deep，自母親十年前因肝癌病逝，父子感情越變親密，父親甚至會陪他練歌，Deep說：「爸爸都係嗰句，放心去做盡情去做，得唔得紅唔紅都冇所謂啦，其實真係咁化咩？冇可能嘅，只係唔想我有壓力箒。」問Deep開騷，父親是否第一時間報名說捧場？他笑言：「佢一定嚟睇，佢試吓唔嚟吖！不過佢初初諗住嚟一場，我就話老竇你住觀塘喎，個騷喺九龍灣搞，你唔係去睇一日呀大佬？219X巴士有站㗎喎嗰度！」
演唱會日子逼近，問Deep是否希望大家重新認識他？他即猛搖頭：「重新認識太奢侈喇，叫人放低以前嘅事都唔會，依家只係遇到啱嘅歌、一個啱嘅平台，就睇大家接唔接受囉。」
不過Deep承認現在心情有點複雜，自言有不容有失的想法，因為那麼多人放下很多想法去支持他，他一定不可以唱得差，破壞大家對每首歌的回憶。
採訪：小米、懷鈺
化妝：KeiKei Ng
髮型：Moe Justin of Fifth
【成功翩身】王浩信拍劇發圍
藝人發展又怎會個個一帆風順？但時間可以改變一切，隨時都有大逆轉的機會。
蘇永康
2002年在台北涉毒被捕，事業受重擊，但經過時間洗禮，早年因一首《那誰》事業翻身，今年已榮升人父。
王浩信
當年以歌手身份出道，拿過不少新人獎，可惜往後日子音樂事業未有起色，八年前加入電視台亦只做閒角，近年才被重用榮升第一男主角。
張繼聰
張繼聰事業浮浮沉沉多年，由於和太太謝安琪發展相差大，最初被指女尊男卑，直至拍《老表》系列才彈起，工作不斷。
李彩華
入行先做模特兒再做歌手，但發展都不太順利，後來返內地拍劇，2012年因為電視劇《回家的誘惑》成功彈出，現在是圈中小富婆。