【馮仁昭四圍超】范振鋒李思欣　加國會華裔小姐

【蘋果日報】范振鋒同老婆李思欣日前飛加拿大出席「多倫多華裔小姐競選2017」，呢次阿范做司儀，老婆思欣做評判。10位佳麗經過唔同環節，冠軍得主係嚟自香港、23歲嘅蔡菀庭，佢同時兼得亮麗秀髮獎、最燦爛笑容獎同神采飛揚獎，係四料得主。亞軍係郭桐，季軍係符善婷，最上鏡小姐係張芷珮。
有時差壓力
阿范首次加國任選美大騷司儀，佢自爆壓力大：「因為飛過去，未調好時差就要開會同綵排，上台要用意志克服眼瞓，選美啲參賽佳麗講中文、英文同普通話，花好多精神，用咗十倍力。」
問阿范係咪攞正牌贒女？佢話：「司儀係唔使望啲女仔，只要睇熟啲稿，贒住現場幕後人員畀手勢，贒女係評判責任，我最多望吓佳麗個樣同號碼。」思欣話賽前喺髮型屋撞到冠軍蔡菀庭：「佢話記得細個睇過我主演《赤沙印記@四葉草.2》。」
撰文：馮仁昭