被問自己「牌頭」值幾錢碧咸完全冇頭緒

【蘋果日報】全英國，甚至可以話全世界最出名嘅家庭，都非碧咸（David Beckham）莫屬。由大仔嘅戀情、兩個細仔嘅日常活動、細女哈七嘅可愛表情、老婆Victoria嘅新消息，甚至佢本人嘅一舉一動，都引起全球關注。最近佢老婆Victoria時裝王國就被估價值港幣10億，而碧咸接受訪問時，就坦言唔知自己「碧咸」呢個牌頭值多錢。
佢最近出席新加坡嘅活動並接受訪問，被問到知唔知自己「碧咸」個牌頭賺幾多？佢話「我完全冇頭緒，但係我為大家都經營到成功嘅生意而自豪。（我）明顯係由運動員變成商業方面嘅發展，最主要都要係有適當嘅人喺身邊、適當嘅朋友、家庭、生意伙伴。佢哋幫我由足球員變成生意人，呢件事令我好興奮，好自豪。要為呢樣嘢估價，我諗我做唔到，我會交俾其他人估算。」今年10月，英國《太陽報》報道碧咸月賺約1百萬英鎊（約港幣1千萬）。