友邦謝仕榮退下火線

【明報專訊】72歲嘅謝仕榮效力友邦保險（1299）49年，睇住公司上市，佢仲未言休，不過明年1月1日起，佢會由名譽主席兼執行董事，退任為非執行主席。而現任主席兼首席執行官杜嘉祺（Mark Edward Tucker），亦會喺明年起，唔再兼任主席職務，轉任為總裁兼集團首席執行官。

退任為非執行主席

友邦發言人話，友邦招股時已講過，逐步將主席同行政總裁職務分家，家只係按照計劃進行。佢又話杜嘉祺會擔任公司發展嘅大舵手，至於會唔會搵人做執行主席職位，就無可奉告。

友邦通告話，謝仕榮轉任非執行主席，每年會收到51.1萬美元袍金，即係大約398萬港元。謝仕榮係友邦老臣子，1961年由精算師做起，1970年被派到母公司美國國際集團（AIG）旗下嘅台灣南山人壽做「開荒牛」，後來仲入AIG做董事，係集團唯一華人董事。小琴記得謝仕榮做AIA阿頭時，好重視農曆新年，佢會趁呢段時間留喺香港，同啲大客仔拜年，又特別安排新春團拜，同傳媒見吓面。不過佢近年已退居幕後，早排忙着處理南山人壽出售工作，少咗喺香港出現。