近年轉戰大銀幕黃宗澤經典角色你記得幾多個？

【蘋果日報】現年36歲嘅黃宗澤，早喺1999年已經入行同大台簽約，計計埋埋已經入行18年，自03年開始年年都有劇做男主角嘅佢，雖然一路喺大台打拼，不過近幾年開始接觸電影，14年仲憑《男人唔可以窮》拎到第6屆「歐洲萬像國際華語電影節」最佳男主角，假假哋都係個影帝，其實佢喺大台都有唔少角色令觀眾印象深刻。
02年，一套《衝上雲霄》除咗喺香港帶起航空熱潮之外，仲帶起咗大台新一代四位小生，吳卓羲、陳鍵鋒、馬國明同黃宗澤，當年四位年輕小生飾演起機師上嚟真係迷倒唔少少女，而四位小生都一躍變做一線。
繼《衝上雲霄》之後，05年黃宗澤同汪阿姐、胡杏兒嘅《我的野蠻奶奶》令到黃宗澤更加入屋，劇中佢飾演表面上怕老婆又怕老媽子嘅裙腳仔，但係暗中又做大俠去為民拯命，搞笑得嚟又夠型，當年仲拎到大台嘅「飛躍進步男藝員」獎。
緊接住06年黃宗澤終於等到一個演技爆發嘅機會，同三哥苗僑偉、歐陽震華等一齊拍攝《賭場風雲》，本來佢只係客串歐陽震華細佬「齊歡樂」一角，但係當中有一幕講述佢執起地下嘅魚蛋食，專業精神同演技令佢獲監製不斷加戲，最終由客串變為第三男主角，演技更加獲得外界一致好評。
其後嚟到11年嘅《潛行狙擊》，今次做奸角「跛Co」嘅佢令到觀眾發現原來佢都可以做奸角，仲好乞人憎下，劇中為咗達到目的無所不用其極，本身套劇已經受觀眾所期待，最終「跛Co」一角成為全劇中最搶眼嘅角色，更加入圍爭視帝，非常威風。
而近幾年嚟其實黃宗澤都有唔少發揮演技嘅機會，好似《好心作怪》中一人分飾兩角，《點金勝手》中嘅卓彧，不過最出色都係《幕後玩家》中嘅大反派「秦昇海」，相信有睇過嘅觀眾到o依家望到佢都仲覺得好嬲，嚟到2017年尾，啱啱開播嘅《溏心風暴3》喺黃宗澤今年第一套大台劇，嚟緊仲有即將開拍嘅《守護神》，黃宗澤嘅表現都可以話得上喺大台之中碩果僅存值得留意嘅事。