98年「電波少女」40歲G奶梁雪湄重出江湖

【蘋果日報】成日講集體回憶，令人驚歎原來唔覺唔覺，咁又廿幾年。你抹開封晒塵嘅記憶，記唔記得無綫曾經有樣嘢叫「電波少女」——冇錯，係食住「電波少年」呢個Gimmick，搵班「胸軍」一字排開佈陣，名單有梁雪湄、汪曉文（後改名汪琳）、雷穎怡（後改雷晴雯）、梁佩盈、任港秀、翟佩雲、李慧萍（後改名李思蓓）同姚樂怡。汪琳即係《十月初五的月光》嗰個汪海琳，任港秀個名曾經同劉鑾雄愛將羅兆輝巴黎出埠醫毒瘡，梁雪湄——G奶呢，仲記唔記得？佢今年四十歲喇！o依家做緊咩？犀利，佢o依家做咗旅遊Blogger，仲有個老外男友，勁sweet！
其實幾年前，G奶梁雪湄呢個名都曾經一度活躍，嗰陣係2013年，梁雪湄過檔港視，但可能係際遇，冇乜作為。
後來梁雪湄轉型從商，開美容院，投資食肆，近年仲做埋Blogger。知喇知喇，想知佢有冇走樣？冇！o依家仲係咁索！
昨日出版嘅周刊搵咗梁雪湄影咗輯火辣三點式泳池相，堅挺如故，條腰依然咁幼，Cup數都冇變。佢除咗講吓近況，例如佢個老外男朋友之外，都講番當年無綫要佢哋着泳衣做節目，o依家諗番都係覺得自己勇氣可嘉。梁雪湄話，嗰陣（即係98年左右）因為唔敢著泳衣展示人前，所以先至放棄選港姐，改為報讀藝訓班，點知又俾人安排咗去做「電波少女」。約就簽咗，冇得話唔做，咁咪頂硬上囉。
「嗰陣好介意啲人淨係望住我個胸，又驚俾人定咗型，試過都俾人話『你哋定咗型0架喇！』真係有唔開心。」梁雪湄叫做好彩，之後喺無綫都有劇拍，例如《陀槍師姐》嗰個四喜，《棟篤神探》嗰個喺大陸做文武生、結果做咗盧海鵬情婦、成為雪妮愛的替身嘅程情……嗯，其他作品真係……
以前冇咩代表作，以後都仲可以有。訪問中梁雪湄都話幾年冇拍劇，都有心思思想復出，仲話o依家人生閱歷多咗，應付內心戲應該好過以前添！起碼要喊都隨時可以喊得出嘛。