【馮仁昭四圍超】方中信鎮宇　鬧君如呃拍戲

【蘋果日報】吳君如導演、陳可辛監製，吳鎮宇和方中信主演嘅新片《妖鈴鈴》，噚日喺北京舉行發佈會，點知記者會變咗申訴大會，兩位男主角喺台上大呻拍戲嘅辛酸，仲笑話俾君如呃咗入局，君如就話自己為咗今次呢部自導自演嘅新戲，打盡人情牌兼又唱又跳，只係想博觀眾一笑。吳鎮宇同方中信仲即場學跳舞，又戴爆炸頭假髮扮君如喺片中嘅角色鈴姐，佢哋大媽上身，完全唔怕醜化形象。
慰勞陳可辛
吳君如笑住話終於明白老公陳可辛嘅辛苦：「改片改到昨晚去機場仍然改緊，廣東話配音又處理了幾個星期。」當然陳可辛都有幫手改，君如笑言要特別慰勞老公：「回家給了陳生特別服務，大家自己估是甚麼啦！」
方中信自爆被騙入局只為兩個字：「突破，君如就是用這兩個字騙了我。」講到佢個大禿頭兼大執胸毛造型，方中信話：「起初覺得幾有趣，但拍了五十幾天夜班，日日戴着這個波膽假頭，就覺得好後悔好辛苦。」吳鎮宇亦投訴俾君如呃：「明明是喜劇，但原來有這麼多追逐打鬥戲。」
撰文：馮仁昭