喬妹真係有咗？宋仲基離港攞住「Babies」

【蘋果日報】韓國男神宋仲基今年10月31號喺首爾新羅酒店娶神劇《太陽的後裔》拍檔宋慧喬，兩人舉行世紀婚禮，吸引各地傳媒到場採訪。
由於兩人一直死口不認戀情，直到今年7月先公開認戀兼同時宣佈婚訊，震驚全城。當時已有不少人猜測兩人奉子成婚，所以才急於宣佈婚訊，但喬妹方面已否認懷孕。而雙宋喺婚前到巴黎旅行，當時有照片流出，喬妹疑似肚凸凸，又再惹來懷孕疑雲。
不過因為當事人冇公開任何消息，所以大家對於喬妹係唔係懷孕都係估估吓，無法求證。而身為雙宋粉絲自然希望兩人早日生B，期待雙宋嘅愛情結晶。
上周四宋仲基來港出席《MAMA音樂頒獎禮》，完成《MAMA》後他直到前日才返韓搵喬妹，事後網上有宋仲基拿住一本印有「Babies」嘅書流傳，令到粉絲一度好驚喜，以為男神報喜，不過原來呢啲只係美麗嘅誤會，從粉絲拍到嘅片段所見，原來該本並非書本，而係粉絲畀宋仲基嘅信，可能粉絲想祝宋仲基早日生B而咁啱就揀咗有「Babies」字嘅信封，但係張相都令到粉絲一度興奮。