【馮仁昭四圍超】轉軚唔否認有小三野人甩崔建邦　心情愉快

【蘋果日報】林珊珊兩位女兒「西瓜」李澄同「野人」李怡、黃翠如、吳若希等，前晚喺屯門出席酒店開幕活動。早排同崔建邦分手嘅野人被問到平復心情未，佢反問：「冇嘢㗎！點解會有嘢？」西瓜即刻幫口：「阿妹係happy girl，又或者調轉講，佢乜情況下心情都麻麻，野人嚟嘛，hyper啲、獨特啲。」野人繼續反問：「點解要唔開心？我好愉快。」
擺阿媽戀情上枱
宣佈分手當日，野人喺Ig表示同崔建邦冇第三者，但隨後有報道指崔建邦搭上李靖筠，問到係咪出現第三者？野人即改口：「我唔評論，呢個唔係我嘅事，要問當事人。」講講吓佢仲擺阿媽上枱，話自己唔心急再拍拖，反而媽咪心急啲，搞到西瓜要即刻兜，話媽咪冇時間拍拖。
吳若希講到之前自爆曾經想唔要BB，佢話：「當時同老公嗌交，分開咗，知道有BB之後，佢呆一呆，嗰時係自己事業高峰期，有諗過BB會唔會犧牲自己事業，但好快已經斬斷呢個諗法，因為小朋友係最甜蜜嘅負擔。」仲話依家同老公唔再嗌交：「因為佢只會俾我鬧，我脾氣差啲，佢好就得我。」
撰文：馮仁昭