方媛留港專心湊女城城接岳母入

【蘋果日報】郭富城老婆方媛(Moka)產後留港專心照顧B女，由於囡囡Chant得三個月大，餵哺母乳次數初時時間較短，但次數較密，所以Moka成日要留喺囡囡身邊，早前陪月照顧完，有報道指Moka目前由方媽接手，幫忙照顧孫女，女婿城城安排岳母住喺大坑「城堡」一個底層單位，大家住同一幢見面方便啲。
報道更影到Chant個樣，指Chant對眼同面型似城城多啲，閒時Moka都有同囡囡喺頂樓露台曬吓太陽，而束馬尾嘅Moka開始出現脫髮現象，髮線啲頭髮有啲稀疏，城城一向工作認真，不過為咗唔想錯過囡囡成長嘅過程，就算有好多工作喺身，佢間中就抽一啲時間留喺香港見家人，如果囡囡唔舒服，佢亦相當緊張，Moka為咗囡囡，將來教育同留港生活，佢努力學廣東話。