信置送「豆」賀佳節

【明報專訊】好多大公司都會喺聖誕佳節前，送個果籃畀傳媒，所以小琴及同事們，呢幾日都食咗唔少朱古力同曲奇。噚日，辦公室就收到一粒「疑似蠶豆」，小琴心諗到底係邊一間公司竟然咁「大手筆」、只係送粒豆過嚟嘅時候，同事發現原來這並非蠶豆，而係信置（0083）送嚟既一粒種子，目的係希望這粒種子可以係辦公室內開枝散葉，為大家增加一點綠色空間。

小琴之後致電信置嘅公關姐姐查詢，佢哋就話這粒外形肥美嘅種子，名為「關懷種子」，上面刻有「關懷」、「Caring」等字樣，希望我哋多關懷一下我哋嘅環境喎。

講開信置，佢地係今年賣咗超過1200個單位、套現咗150億大元，成績係繼新地（0016）、長實（0001）兩個「大孖沙」之後嘅第三佳，真係可喜可賀。小琴聽聞，信置出年推售嘅重頭戲包括有廣播道1號、大埔白石角項目，同埋西九龍海泓道項目，除打造為豪宅外，聽講都有唔少環保設計元素㖭。