華商領袖獎 超級富豪個個甩底

【明報專訊】華商領袖年會噚晚搞咗個頒獎禮表揚中港商家，獲獎名單都幾金碧輝煌㗎，「終身成就獎」有恒基地產（0012）主席李兆基、金利來（0533）集團主席曾憲梓、協成行主席方潤華、新世界發展（0017）主席鄭裕彤，同埋中國僑聯副主席陳有慶，「特別貢獻獎」就頒畀長實（0001）主席李嘉誠，不過唔知係咪班老人家個個都要做冬，凑下孫仔，除咗陳有慶之外，全部都無出席。

到底呢個頒獎禮嘅得獎名單係點遴選？大會嘅場刊就無乜介紹，小琴只係知道，主辦機構領袖傳播集團主席夏萍，以前曾經幫過曾憲梓同李嘉誠寫過傳記，合辦機構包括中國僑商聯合會、香港總商會、香港明天更好基金、香港中國商會，而合作媒體鳳凰衛視個老細劉長樂，亦係9個「年度大獎」得獎者之一。

一眾傳媒早前收到邀請函話恒隆地產（0101）董事長陳啟宗會做頒獎禮嘅演講嘉賓，點知噚日佢都係無出現，小琴真係覺得好奇怪，明明見到場內有個花籃恭賀佢榮獲「終身成就大獎」，點知最終領獎名單又話無佢份，當中發生過乜嘢事，就真係唔敢亂估喇。